O Bradford City, da League Two inglesa (algo parecido á Terceira aquí, a cuarta categoría), acaba de clasificarse para a final da copa (League Cup) en Inglaterra. En España ver algo así, debido o teledirixido e oligárquico sistema de copa, antóllase practicamente imposible. Aínda que os ingleses xa teñen a FA Cup para mesteres semellantes. Aquí, con tal panorama, ós nosos só lles queda a competición ligueira e, a veces, a Copa Federación.
A máxima categoría autonómica xa pasou o ecuador fai dúas xornadas e déixanos coma líder destacado ó Rácing. Os ferroláns van primeiros (51 puntos a oito do segundo) e con tódalas trazas de xogar o playoff, salvo catástrofe, claro. Os goles de Jorge Rodríguez e Manu Barreiro (doce cadanseu e a metade dos do equipo) son claves no éxito do club departamental. Nos verdes tampouco pasa desapercibida a tempada do mediapunta ferrolán Pablo Rey, que ademais leva sete goles. Aira conta cun moi bo once aínda que o plantel pódeselle quedar curto para a segunda volta. Aínda así, o Rácing semella (ó igual co filial celeste) un punto por riba dos demais.
A trece puntos, terceira, sitúase a SD Compostela. A cal tentará o seu segundo ascenso consecutivo e así acadar a ansiada categoría de bronce. O Compos conta co máximo goleador do grupo (Joselu, 21 tantos, líder destacado) e o Zamora (Adrián, cun 0,85 de promedio).
Entre eses dous clubs atópase o filial do Celta, cinco puntos por riba do Compos, non están mal clasificados aínda que a veces se esperaba un desempeño maior dos xogadores do último chanzo da Madroa. Coa baixa recente de Johnny (sobe ó primeiro equipo) xogadores coma Rubén ou Añón agardan oportunidade. Santi Mina, a nova perla do xuvenil e do fútbol galego, acaba de subir ó filial.
Na cuarta posición, temos ó Fabril, o filial do Dépor, que tenta loitar pola clasificación ó playoff que se lle escapou a temporada pasada. Moi pegado ó Compostela, ten por detrás, preto, o Cerceda (en horas baixas comparado con tempadas pasadas), Somozas e todo un clásico do noso fútbol coma é o Pontevedra. Nos rapaces de José Luís Devesa están a acaparar tódolos focos o defensa Pablo Insua e centrocampista portugués Teles.
Na parte baixa continua, de seguir así, a desfeita do fútbol pontevedrés. A tempada pasada baixaron catro clubs desta provincia e agora temos a dous no descenso (Vilalonga e Céltiga). Os representantes son seis agora, por un ourensán e outro de Lugo. Os doce restantes son coruñeses, provincia dominadora da categoría. En descenso tamén están o Narón BP e o Bergantiños. Moi preto deles hai unha ampla nómina de equipos na que se atopa o subcampión do ano pasado (Alondras, a oito puntos) e o outro dos destacados no 2012: o Rácing Vilalbés, a catro.

Remata aquí este breve repaso da Terceira. Noutra quenda xa nos deteremos máis na análise dos equipos. Especialmente cos da parte baixa e media, dos que hoxe apenas falamos.

Despois dunha longa ausencia estamos de regreso.
Xa transcorrida a primeira volta na LFP, a sorte dos galegos é diferente en Primeira e en Segunda.
Celta e Dépor están inmersos na loita pola permanencia. Os herculinos, decidiron prescindir de Oltra tras varias xornadas nos postos de descenso, sendo pechacancelas nalgunha xornada. Para substituílo veu outro representado de Mendes: Domingos Paciencia. O adestrador portugués, nas dúas xornadas que dirixiu, outorgou ó equipo unha seriedade defensiva da que carecía con Oltra. A vitoria contra Málaga e o empate de Anoeta son un bo comezo nesta nova etapa. Ademais, o Dépor conta coas incorporacións de Silvio e Assunção (Atlético e São Paulo) seguindo así coa política da «Operación Plata-no». Por se fora pouco, o club coruñés vai comezar un duro proceso concursal que determinará o futuro da entidade. Agora mesmo atópase en postos de descenso, 19º.
A un punto do descenso (15º) está o Celta. Os vigueses seguen coa súa sangría de puntos fóra da casa que, a pesar do bo xogo mostrado, non os fai arredarse dos postos de perigo. Ademais, tralo bo desempeño na copa (remontada ante o Almería e unha vitoria fronte o Madrid) os celestes sempre pagaron a peaxe na Liga, o pago foi en puntos. Ademais das lesións de Túñez (tres semanas) e Mallo e Llorca (toda a tempada).
O Celta buscou reforzos neste mercado invernal (Demidov) e segue na procura dun xogador na parcela ofensiva (o resto de carencias tentará solventalas coa inesgotable canteira da Madroa, coma Johnny para o lateral dereito). Neste mercado marcharon Joan Tomàs e Bustos. Agora, con só a Liga en mente, os celestes tentarán gañar o terreo perdido coma visitante e consolidarse coma locais, só por aí pasan as opcións de salvación.

Na Segunda, o Lugo era un dos peores visitantes (non gañaba fóra dende marzo do 2012) pero tres vitorias consecutivas fóra (e en campos dificiles: contra Almería, Sabadell e Ponferradina) non só o fixeron colocarse coma o quinto mellor visitante, agora está a dous puntos da promoción de ascenso e está colocado placidamente na loita pola salvación (o obxectivo real). Coma local a cousa tamén foi ben: gañou ó Elche, Castilla e empatou co Guadalajara. Hoxe, acaba de marchar ó Oviedo Fran Sol (cedido) e asinaron ó excéltico Guayre. Segue a proba a promesa kosovar Krasniqi Endurit. Outras altas son: Iván Pérez, Airam e Tena. Nas saídas: Berodia e Raúl Fuster. Agora son décimo primeiros, dez puntos por riba do descenso.

En 2ªB, o Coruxo segue coa súa espectacular tempada e ten a salvación (na xornada vinte) moi preto. Agora son sextos a un punto do terceiro e a once do descenso. Teñen 32 puntos no seu haber. Sete por debaixo está o Ourense, non mal situado, décimo terceiro. Acaba de incorporar a Óscar Martínez trala marcha de Jona.

No tocante ó futbol feminino segue a loita polo posto de promoción de ascenso entre as galegas de El Olivo e as asturianas do Oviedo Moderno. Terceiras van as de Friol pero lonxe destes dous equipos que teñen a súa liga particular. A falta de dez xornadas, Erizana e Atlético Arousana parecen que poderán salvarse sen excesivo apuro. Victoria, Compos e Sárdoma atópanse demasiado preto dos postos de descenso coma para permitirse ningún tipo de relaxación.

A pesar de que un non se pode relaxar, aínda hai vida, queda tempo, media liga.

Despois da etapa máis dura co calendario (Sevilla, Madrid e Barcelona, máis un derbi polo medio) Celta e Dépor atópanse nos postos baixos da táboa. Os herculinos están en descenso, decimo oitavos con dez puntos, e os olívicos, co mesmo número de puntos son décimo sétimos. O medo nalgúns sectores do club é latente e, aínda que é cedo para agoirar o peor dos destinos, hai que apurar xa. Esta xornada, os vigueses reciben a un Mallorca (que foi a revelación nas primeiras xornadas) vido a menos en parte gracias ás lesións que deciman ó club balear. No cadro celeste recuperan a Oubiña pero perden a Cabral pola sanción trala expulsión polémica de Vallecas. O Dépor tamén perde a Pizzi por idéntico motivo e recibe a un rival duro coma é o Levante. Aínda que os valencianos, se ben son case inexpugnables na casa, é un rival que fóra do Ciutat de València é moito máis feble. Unha vitoria, obviamente, acougaría os temores en ambos clubs pero unha nova derrota pode que faga saltar as alarmas nos seos dos equipos galegos.
A situación do Lugo, na División de Prata, non é tan mala pero tampouco é idílica. Están catro puntos por riba do descenso, son décimo cuartos e teñen dezaseis puntos en trece xornadas. O problema que preocupa na Cidade da Muralla é que os franxivermellos non son quen de gañar fóra do Anxo Carro (dende marzo) e, entón, os puntos na casa antóllanse vitais. Esta semana reciben a un rival en moi bo estado de forma: o Girona. Os Blanquivermells van segundos sendo uns dos mellores visitantes da categoría e só cedendo dous puntos en Montilivi. Difícil encontro para os lucenses que deberan empregarse a fondo para derrotar a este perigoso visitante.
Un chanzo máis abaixo, na 2ªB, temos ó Coruxo nun bo momento: a dous puntos dos playoffs do ascenso marchan sétimos e, catro puntos por debaixo, vai o Ourense a tres do descenso. Os do Couto reciben a un rival en postos de descenso: o Marino (de Arona). Boa ocasión para abrir oco cos equipos da zona baixa. Por outra banda, os vigueses reciben a un rival que está entre o Ourense e os postos de descenso: o Getafe B.
Na Segunda Feminina, O Compos recibe ó Friol, o Atlético Arousana vai a León para enfrontarse ó Trobajo del Camino, El Olivo recibe ó Erizana e o terceiro derbi da semana será o que enfronte en Vigo ó Vitoria coma o Sárdoma.

Os tres equipos galegos da LFP sufriron duras remontadas nesta xornada de Liga. Especialmente severas foron as dos dous de Primeira que miraron coma as súas visitas a Madrid e Zaragoza resolvéronse sen premio algún tras ir gañando 0-2 con relativa facilidade.
O Celta visitaba Vallecas cun novo once inédito por mor das baixas e o experimento de Herrera parecía bo: o Celta, con menor posesión co Rayo, atravesaba con facilidade á defensa local á contra. Os franxivermellos non podían coa potencia ofensiva dos vigueses é á terceira de Aspas xa ían perdendo dous a cero con dous goles do ariete moañés.
Pero o árbitro, de gatillo fácil, non tivo piedade de Cabral (si de Piti) e acabou expulsando o arxentino co cal o Celta perdeu presenza no campo en beneficio dos locais que, no segundo tempo, foron amos e señores do encontro. Se a isto lle sumamos as concesións en defensa dos celestes e o dubidoso penalti de Túñez, a remontada era cousa de tempo. 3-2 resultado final e un Celta que preocupa atrás e un estamento arbitral que xa se fai notar demasiado en contra do Celta.
Despois dos vigueses foi a quenda do Dépor. Os galegos comezaron moi ben, os goles de Gama e Riki auguraban unha tarde plácida pero o empuxe dos locais máis un penalti a favor déronlle esperanzas a un Zaragoza que non deixou de loitar polo encontro. 1-2 ó descanso e trala reanudación a expulsión de Pizzi deulle ás ós maños. Demasiadas similitudes co partido do Celta, o medo da remontada collía forza. En media hora, un Zaragoza pletórico anotou catro tantos que acabaron co Dépor que aínda tivo tempo de anotar un gol máis, obra de Bodipo. 5 a 3 e un Dépor que acaba en postos de descenso empatado a puntos co Celta, que está fora dos postos de perda de categoría.

Despois da gran vitoria no Anfield Carro fronte ó Elche, a Muralla de Prata visitaba o difícil estadio de Santo Domingo. Duro rival o Alcorcón en casa, aínda así os lucenses souberon adiantarse despois de aguantar nun tedioso partido case sen ocasións. Un gol de Rubén Durán no ‘62 daba vantaxe os galegos que co paso dos minutos perderon forzas e o Alcorcón fixo gala da súa gran pegada con tantos de Babin e de Dani Nieto, que culminou a remontada cun furonazo dende trinta e cinco metros a falta de tres minutos para a conclusión.

Na 2ªB, o Coruxo acadou un valioso empate fronte o Tenerife (1-1) no Vao e o Ourense 2-2 en Salamanca. Os vigueses van sétimos a dous puntos dos postos de playoff de ascenso o os ourensáns van tres puntos por riba dos postos de descenso directo.

No tocante ás mulleres, asistimos a outra exhibición de El Olivo que gañou 0-2 ó Femiastur e seguen líderes. O Atlético Arousana perdeu o derbi co Compostela (1-2) e o Sárdoma perdeu en Baiona 2-1 coas rapazas do Erizana. O Victoria empatou en Coruña co Gijón (1-1) e o Friol perdeu no importante duelo co Oviedo Moderno por 0-3, descolgándose así da cabeza da táboa.

Trala eliminación en segunda rolda do Ourense mailo Lugo, volvemos a ter representación en dezaseisavos de final cos equipos de Primeira: Celta e Dépor.
Coma vén sendo habitual na Copa, a maior parte dos equipos xogarán cos menos habituais e con algún reserva, coma é o caso dos galegos:

O Celta enfróntase hoxe no Juegos del Mediterráneo ó Almería (20.00) e no seu once titular, presumiblemente, sairán Toni, Joan Tomàs, Sergio ou Vila entre outros. Tamén pode ser a hora de xente coma Abalo, que desfrutará da súa primeira convocatoria no que vai de ano. Tamén entran na convocatoria xente coma Johnny Castro ou o internacional gabonés do Celta B, Levy Madinda.
O posible once dos vigueses, que non renuncia a nada a pesar do dificilísimo cadro que lle tocou no sorte, será: Sergio; Johnny, Vila, Samuel, Bellvís; Bustos, Madinda (ou Álex López); De Lucas, Joan Tomàs, Toni e Park.

Por outra banda, o Dépor recibe o xoves (21.00) ó Mallorca en Riazor (duelo que se reeditará o domingo). Falábase de convocar ó prometedor xogador de dezanove anos do Fabril, Tesé, pero finalmente o portugués non entrou na convocatoria. Si o fai Tiago Pinto, que posiblemente xogue de estremo e non de lateral para, así, cubrir as tres posicións de mediapunta. A pesar das lesións de Aguilar e Salomão (entre outros condicionantes) o adestrador deportivista, Oltra, non decidiu convocar a ningún xogador do filial branquiazul. O valenciano, é probable que se decante por un once coma este: Lux; Manuel Pablo, Aythami, Roderick, Evaldo; Jesús Vázquez, André Santos; Saúl, Camuñas, Tiago Pinto e Nelson Oliveira.

As viguesas de El Olivo varreron no derbi da Reigosa (1-3). Coa sorprendente derrota do Oviedo Moderno en Ponferrada (1-0), o club vigués é líder en solitario.
Friol segue terceiro, empatado a puntos coas rapazas do Oviedo. O outro derbi (Victoria – Compos) acabou con empate a uns e, o dobre duelo galego-asturiano, rematou con dúas vitorias galegas: o At. Arousana gañou 2-1 ó Mareo e o Erizana 2-0 ó Gijón. O Sárdoma cedeu un empate na casa co Trobajo (1-1).

Na 2ªB, o Coruxo gañou 1-0 ó Atlético B e o Ourense empatou a uns no campo da Sanse. Os ourensáns tiñan un duro rival enfronte, moi serio atrás e forte arriba, pero os galegos aproveitaron un dos poucos erros dos locais para adiantarse no marcador cun gol de Jona, en estado de gracia.
O Sanse seguiu o seu e o gol era cousa de tempo, a pesar da férrea defensa que colocaron os visitantes. Case no descanso, o Sanse empataba e xa no segundo tempo lanzáronse a polo partido, partido no que o adestrador do Ourense non quixo pecar de ambicioso e asegurar un importante punto. Renunciando á vitoria, o equipo encolleuse e adicouse a defender o resultado. Un puntiño de ouro que non serve para arredarse dos postos quentes da zona baixa.
Por outra banda, o coruxo volve polo vieiro da xenial xeira do comezo de tempada e xa está empatado a puntos co último posto que dá dereito a xogar o playoff de ascenso.
A receita da vitoria foi a de sempre: seriedade e dilixencia atrás e efectividade arriba, especialmente á contra. Contras que foron minguando segundo avanzaba o encontro para ir botándose atrás e amarrar a vitoria.
O gol do Coruxo foi cousa de Samuel no primeiro tempo, na primeira boa que tiveron. O Atlético tamén disfrutou de ocasións claras que non puido materializar. Agora os vigueses están oito puntos por riba do ascenso.

Segue resistíndoselle a vitoria coma visitante ó Lugo. Onte perdeu en Chapín (1-0) contra un Xerez que xogou media hora con dez e sufriu dúas expulsións máis nos minutos finais. Os andaluces aproveitaron a primeira que tiveron pero o Lugo non aproveitou nada xa que non tivo case ocasións, custáballe unha chea crear perigo. A inercia de final do partido, co Xerez aguantando o resultado (especialmente ó quedar con nove pola expulsión de Bouzón no ‘81) e totalmente atrás, fixo que o Lugo se viñera máis arriba e puidera soñar cun empate que onte non mereceu e fronte un rival que rematou o partido con oito xogadores.

Todo listo para a festa do fútbol galego. Esta tarde regresa o derbi a Primeira, no estadio de Balaídos ás 20.00. Semella que o feudo vigués non estará ateigado ó 100% pero rozará o cheo. O clima acompaña a medias: non choverá pero fará frío. Os celestes terán máis de 26.000 gorxas ó seu favor e os deportivistas contarán co calor de oitocentos seareiros que viaxan con eles.
Partido declarado de alto risco, coma vén sendo habitual dende as últimas décadas, non contará coa presenza dos galegos Abalo, Vila, Rubén e Johnny, polo lado vigués, e de Seoane na convocatoria herculina.
O Dépor sairá cun 4-4-2 con Aranzubia; Laure, Marchena, Zé Castro e Ayoze; Álex Bergantiños e Juan Domínguez; Bruno Gama, Valerón (ou Camuñas) e Pizzi e na punta do ataque: Riki. Na convocatoria branquiazul destaca a presenza do lateral esquerdo Tiago Pinto.
No Celta, dubidamos se sae co 4-2-3-1 do ascenso ou do recente (e exitoso) 4-4-2. O once, tamén coa dúbida do enganche, será: Javi Varas; Hugo Mallo, Cabral, Túñez e Roberto Lago; Borja Oubiña e Álex López; Augusto Fernández, Park (ou Bermejo) e Krohn-Dehli. Aspas será o ariete titular.
Os locais teñen a baixa de Natxo Insa e os visitantes a de Abel Aguilar e Salomão.
Os dous equipos tentarán facerse co balón e co dominio do encontro, polo que se prevé unha decisiva batalla no medio co campo entre as dúas parellas de pivotes galegos. Os celestes parten coma favoritos, de manter a seriedade atrás e evitar os erros defensivos (que xa estragaron algún encontro) terían moito xa o seu favor para levarse os tres puntos.
Os deportivistas, con dificultades atrás, tentarán facer bo o seu xogo ofensivo para a conquista de Balaídos.
Dous equipos que, diferenzas a parte, semellan contar coas mellores virtudes na parcela ofensiva e coa maioría das miserias na zaga.
Arbitrará a contenda o colexiado do último derbi en Primeira: Undiano Mallenco (colexio navarro).

Nunha xornada na que o fútbol galego se paraliza arredor do derbi entre o Celta é Dépor, non podemos obviar o outro súper derbi galego: o que enfronta na Reigosa a PM Friol fronte o FVPR El Olivo. Tanto viguesas coma lucenses enfróntanse no máis alto da táboa. Ningunha escuadra cedeu puntos na Segunda Feminina. Contan as seis xornadas por vitorias, igual que o Oviedo Moderno, e só a diferenza de goles (onde El Olivo é moi superior, +26 por +10) determina as posicións. Así, as viguesas son segundas e as rapazas do Friol van terceiras. O líder, Oviedo (+30), xoga en Ponferrada e son claras favoritas para gañar. Con isto, este partido antóllase vital, non só polo directo do duelo, tamén para non perder proximidade coa primeira praza, a que clasifica ó playoff.

O derbi dos homes quedou coma único partido en sábado, polo tanto temos unha intensa xornada de domingo. O devandito derbi feminino xógase de tarde ás 17.00. Xa na hora do vermú dominical temos dous partidos: en Arousa, o Atlético – Mareo e en Baiona, o Erizana – Gijón. A xornada feminina complétase ás catro co encontro entre o Sárdoma co Trobajo e outro derbi: Victoria – Compos.

Na Segunda B, volve a haber un dobre enfrontamento entre galegos e madrileños: o Coruxo recibe ó Atlético B e o Ourense visita ó Sanse. Ambos son rivais pola permanencia, a vitoria dos ourensáns permitiríalles escapar do lume e ó Coruxo seguir soñando con cotas máis altas. Os encarnados xogan ás doce e os vigueses ás 17.00.

A muralla de prata visita Chapín para enfrontarse a un rival directo pola permanencia. Os lucenses seguen cos seus problemas fóra do Anxo Carro, de seguir con esta xeira (non gañan fóra dende marzo e nesta tempada levan tres puntos fóra de tres empates) poderían meterse no barro da parte baixa. Urxe puntuar fóra por se o plan do Anxo Carro falla. O Lugo pecha a xornada o domingo ás seis.

No mes de abril Celta e Dépor enfrontáronse en Balaídos (crónica aquí) por última vez. A última na máxima categoría fora tamén o mesmo día, un quince de abril, pero de 2007. Daquela debutaba Stoichkov no banco e os celestes gañaron por 1-0 nun ano no que non puideron eludir o descenso ó final de tempada.
Dende o último derbi, ambos clubs acadaron o ascenso directo a Primeira. Sería máis sinxelo todo de non ser pola intensidade que marcou o Valladolid (rival relegado ó playoff e que finalmente tamén ascendeu). Os branquiazuis conseguírono antes, foron campións, e os celestes tiveron que esperar á última xornada para ascender.
Xa en Primeira, o Dépor comezou gañando 2-0 a un frouxo Osasuna, logo tres empates (Valencia, Getafe e Granada) e logo catro derrotas (Sevilla, Madrid, Rayo e Barça). Tras estas xornadas, xente coma Abel Aguilar, Pizzi ou Riki mostraron o seu bo estado de forma e amósanse como as mellores pezas coas que contra Oltra. Por outro lado, Evaldo (lateral dereito vido coa Operación Plátano) foi sinalado coma un dos culpables da mala xeira e relegado á suplencia a favor de Ayoze. Por desgraza para os herculinos, o xogador de Barranquilla, Aguilar, será baixa e non xogará en Balaídos. Pizzi e Valerón poden quedar no banco. Aínda que, a pesar das molestias, a presenza no once titular do portugués esta garantida. De non xogar o canario, Camuñas entrará no once. O Dépor con esta xeira negativa de resultados (catro derrotas seguidas e sete sen gañar) acabou en postos de descenso. É décimo oitavo, a dous puntos da salvación e tres do Celta.
Os vigueses comezaron a tempada fichando a última hora, case sobre a bucina, e iso provocou falta de axuste nas xornadas iniciais. Aínda así, a pesar das derrotas, o Celta amosou sempre bo xogo (agás fronte a Real Sociedade onde foron moi inferiores e fronte o Madrid onde, correctos, pecaron de timidez excesiva). Perdeu na primeira xornada fronte o Málaga e tódolos partidos fóra.

Agás en Anoeta e no Bernabeu, o Celta adoitaba ser superior e merecer mellor premio do obtido, especialmente en partidos coma o de Los Cármenes. Nunca empatou e na casa gañou os tres últimos (tres de catro). O que fai un total de nove puntos, o Celta é décimo terceiro con tres puntos de vantaxe sobre o Dépor, que marca o descenso e a catro da zona de postos de Europa. Está, polo tanto, na zona temperada da táboa.
Xa co equipo acoplado (Herrera vaticinou que sería en Outubro ou antes e así foi), no que vai de Liga os máis destacados son Cabral na defensa, Oubiña na media e Aspas arriba, que está sendo unha das sensacións e revelacións do que vai de Liga.
O Celta ten na enfermería a Natxo Insa e ten con molestias ós homes titulares da banda dereita: Augusto e Mallo, pero xogarán con total seguridade o sábado (salvo sorpresa, claro). O once do Celta semella claro agás na posición de enganche, que se desputan Park e Bermejo, aínda que De Lucas (ou incluso Álex) é dos outros plans que pode manexar Herrera. O sábado, ás oito da tarde, veremos quen sae.

Estamos en semana de derbi!
Despois de seis anos Celta e Dépor volven a xogar na máxima categoría! Os ánimos non están tan alterados coma o ano pasado (mellor) pero as ganas e a festa son as de sempre!
Nesta semana de derbi imos comezar coa segunda parte da reportaxe sobre os galegos en Primeira. Faltaban os dos dous equipos galegos, aí van:

Tralo aportuguesamento do plantel coruñés coa Operación Plátano, baixou o número de galegos en Riazor. No Dépor temos tres: Álex Bergantiños, Seoane e Juan Domínguez. Aínda que podemos contar catro: o canteirán Juan Carlos Real, que igual pode desputar algúns minutos co primeiro equipo esta tempada. Tampouco xogou aínda Seoane, e semella que o vai ter difícil. Pero Bergantiños e Domínguez si tiveron máis protagonismo.

Parella titular o ano pasado, este ano só coincidiron de comezo fronte o Madrid, en parte por culpa da chegada de Abel Aguilar. A lesión do colombiano fará posible a reedición deste medio do campo galego no derbi (igual co derbi da tempada pasada). Polo de agora, Juan Domínguez xogou os seis primeiros encontros de titular. Só perdeu media hora en total nas tres veces que foi substituído. Álex foi titular nos tres últimos, antes só xogou corenta e nove minutos en dous partidos nos que saíu dende o banco.
O dito, esta parella ten unha ocasión de ouro para reivindicarse no derbi.

Por outra banda, o Celta conta no primeiro equipo con once galegos. Un deles é Johnny, a última perla da canteira celeste, que alterna o Celta co filial. Segundo lateral dereito, xogou o partido fronte o Osasuna pola baixa de Mallo (e rendeu moi ben). Mallo, o de Marín, é titular na zaga celeste xunto cos galegos Túñez e Roberto Lago. A media titular tamén e cousa de galegos: Oubiña e Álex López. Na punta de ataque, e unha das sensacións da tempada, temos a Iago Aspas.
Suplentes adoitan ser Sergio (que xogou os encontros fronte Sevilla e Real Madrid) e Toni (que con De Lucas é o recambio habitual de Augusto, aínda que xogou noutras posicións). Alternando banco con non convocatorias está Vila que aínda non xogou. Tampouco xogou o galego Dani Abalo, condenado ó ostracismo aínda que o rapaz non perde esperanza. Suponse que sairán seis galegos mínimo, no once titular o día do derbi.

Tampouco podemos esquecernos doutros porteiros do Celta: Yoel (cedido ó Lugo) e Rubén Blanco (promesa que entra coma terceiro porteiro). No Dépor teñen ó galego Rochela cedido no Santander.

Creo que non me esquezo a ningún. Ou si? Faimo saber!